Украина президентининг қароргоҳи олдида ўзбекларнинг пикети бўлмоқда

Шу дақиқаларда Украинада вақтинча яшаётган ўзбекистонлик қочоқлар президент Юшченконинг Киевдаги қароргохи олдида пикет ўтказмоқдалар. Уларнинг асосан 2 талаблари бор:

1. Бундан бир неча ой аввал Кримдан Ўзбекистонга ноқонуний депортация қилинган 11 нафар ўзбек қочоғининг тақдири билан Украина ҳукумати шуғулланиши лозимлиги.

2. Ҳозир Украинада яшамоқда бўлган бир неча минг ўзбекистонлик қочқинларга халқаро нормаларга кўра муносабатда бўлиш, ҳуқуқ-тартибот органлари томонидан уларнинг ҳақ-ҳуқуқларини топташ ҳолларига барҳам бериш.

Таҳминан 30 киши қатнашаётган пикет “Бирлик” Партиясининг Украина бўлими, Украинадаги ўзбек сиёсий қочқинлари жамияти, ва Украинанинг “Чегара билмас ташаббуслар ҳаракати” томонидан тайёрланган. Пикетда “Пора” партиясининг вакиллари ҳам иштирок этмоқдалар.

Пикетчиларнинг қўлларида уларнинг талабларини ёритувчи плакатлар ва депортация қилинган 11 қочоқни рамзий шаклда ифодаловчи 11 кишининг картондан ясалган силуэтлари бор бўлиб, уларга депортация қилинганларнинг исмлари ёзилган. Плакатлардан бирида иккита каллали аждаҳонинг сурати чизилган ва унинг бир калласига “Украина Хавфсизлик Хизмати”, иккинчисига эса, “Украина Миграцион хизмати” сўзлари ёзилган.

Пикет Украинанинг 1-чи ва 5-чи телеканалларининг камералар билан жиҳозланган гуруҳлари ва кўплаб газеталарнинг мухбирлари томонидан кузатилмоқда. “Бирлик” Партияси раисининг ўринбосари, Украинадаги ўзбек сиёсий қочқинлар жамияти раиси Исмоил Дадажон, жамият раисининг ўринбосари Ҳотам Хожиматов ва бошқалар журналистларга пикетнинг мақсади ва талабларини тушунтириб интервьюлар бермоқдалар.