Киевдаги пикетнинг мавзуси: Ўзбекистон албатта ГУОМга қайтади

Кечаги хабаримизда эълон қилинганидек, бугун Украинада яшаётган ўзбек қочқинлари “Бирлик” Партиясининг Украина бўлими раҳбарлигида ГУОМ саммити ўтаётган Украина президенти қароргоҳи олдида пикет ташкил қилдилар. 22 киши қатнашган пикетда Каримовнинг ГУОМдан чиқиш қарори қораланди ва вақти келиб Ўзбекистон Каримовдан қутилиши ва Ўзбекистон ГУОМга қайтиши айтилди. Шу руҳдаги плакатлар кўтарилди.

Пикетчилар олдига чиққан Украина президенти Юшченконинг бош маслахатчиси Тарас Овчарук “Бирлик” Партияси раисининг ўринбосари Исмоил Дадажон билан суҳбатлашди ва пикетчиларнинг истак ва талабларини ўз ичига олган пресс-релиздан бир дастасини олиб, уларни саммит қатнашчиларига тарқатишга ваъда берди.

Бироздан кейин пикетчиларнини кузатаётган ўнлаб маҳаллий телевидение ва бошқа оммавий ахборот воситаларининг вакиллари ёнига саммитини сарой ичкарисидан туриб ёритаётган чет эл телевидениеларининг оператор ва журналистлари чиқдилар. Уларнинг ичида Туркия, Озарбайжон, АҚШ, Литва телевидениеларининг вакиллари бор эди. Улар Исмоил Дадажон ва бошқа “Бирлик” фаоллари билан суҳбатларни тасмага туширишди.