“Бирлик”нинг Марказий Кенгаш мажлиси олдидан махсус хизматлар оёққа турди

Самарқанддан олинган хабарга кўра, кеча эрталаб “Бирлик” Партиясининг шу вилоят ташкилоти раиси Ҳолиқназар Ғаниевнинг уйига милиция ходимлари келиб, ўзи йўқ бўлгани учун ўғилларини, бугун кечаси эса унинг ўзини шу кунларда ҳеч қаерга бормаслик хусусида расман огоҳлантирганлар. Акс ҳолда ўзига ёмон бўлишини айтишни ҳам унутишмаган.

Бугун эрталаб Ҳолиқназар акага АҚШдан телефон қилган партия раиси Абдураҳим Пўлат бу воқеаларнинг тафсилотлари билан танишди. Маълум бқлишича, шу соатларда “Бирлик” фаолининг уйи олдида махсус автомобиль қоровуллик қилмоқда.

Вазиятдан келиб чиқиб, ўтган йили икки марта шундай шаклда Тошкентга кетаётганда ўғирлаб кетилган Ҳолиқназар аканинг Тошкентга бориши шарт эмас деб топилди. У кишига “Бирлик” Марказий Кенгаши учун тайёрланган ҳужжатлар (Кун тартиби ва қарорлар лойиҳаси, Абдураҳим Пўлатнинг президентлик сайловлари арафасида мухолифат кучларини бирлаштириш хусусидаги йўл-йўриқ ва таклифларини ўз ичига олган хати) электтрон почта орқали юборилади ва Ҳолиқназар ака ўз фикрларини яна электрон почта орқали МК котиблигига жўнатади. Шу йўл билан у кишининг МК мажлисида феълан иштирок этиши таъминланади.