«Бирлик»нинг Марказий Кенгаши президент сайловига оид асосий қарорини қабул қилди

Кеча, 1 июлда «Бирлик» Партияси Марказий Кенгаши мажлиси ўтказилиши мўлжалланганди. Ҳукуматнинг кучишлатар тизими 3 июнда ўтказилиши режалаштирилган мажлисни партия фаолларини ушлаб колиш эвазига тўхтатишга эришганини ўша кунги хабарларимизда билдиргандик.

Бундан сўнг мухолифатчиларга осон бўлмаслиги кўриниб колгани учун, “Бирлик” раҳбарлари бундан кейинги мажлисларни керак бўлса Интернет орқали ёки селектр услубида ўтказишни ҳам кўзда тутишга қарор қилишганди.

Кеча, кутилганидек, 3 июнь воқеалари айнан такрорланди. Яна режим оёкка турди. Фарғоналик сафдошларимизни ҳатто уйларидан чиқартирмадилар. Самарқандда ҳам шундай бўлди. Қашқадарёлик Марказий Кенгаш аъзолари йўлдан қайтарилди. Партия Бош котиби Васила Иноят йиғилиш мўлжалланган вақтда туман ИИБга олиб кетилди. Мажлис ўтказиш жойи «Эзгулик»нинг Тошкентдаги офиси бўлмаса ҳам, бу ер миршаблар томонидан ўраб олиниб, мунтазам назоратда тутиб турилди. Мажлисга фақатгина Тошкент вилояти ва шахри вакиллари етиб келди.

Лекин мажлиснинг кун тартиби, унда қабул қилиниши мўлжалланган қарорларнинг лойиҳаси аввалдан Марказий Кенгаш аъзоларига тарқатилгани ва уларнинг бу хусусдаги фикрлари маълум бўлгани сабабли, “Бирлик” Партиясининг 1 июлдаги мажлиси ўтказилган деб ҳисобланди.

Мажлиснинг кун таритибида 3 масала бор эди: 1. Партияни Адлия вазирлигидан рўйхатдан ўтказиш жараёнини давом эттириш; 2. Президнт сайловига тайёрланиш; 3. Партиянинг навбатдаги қурултойи хусусида.

Кун тартибининг 1 ва 3 масалалари бўйича олинган қарорларда принципиал янгиликлар йўқ. Партияни рўйхатдан ўтказиш бўйича ишлар давом эттирилади, партиянинг қурултойи, Уставга кўра шу йилнинг сўнггида ўтказилиши лозим эди, президент сайловлари туфайли у бироз кечиктирилиб, янаги йилнинг 1 кварталида ўтказилади.

Президент сайловларига тайёрланиш масаласида қабул қилинган қарорлар принципиал аҳамиятга эга эканлиги ўз-ўзидан маълум. “Бирлик” Партияси келаётган президент сайловида мухолифат умумий номзод билан қатнашиши лозимлигини расман таъкидлади ва бу масала “Давра кенгаши”нинг конференциясида ёки мухолифатнинг умумий қурултойида ҳал қилиниши керак деган қарорга келди.Шу билан бирга, президент сайлови Конституциядан кўрсатилаган муддатдан (2007 йил, декабрь) ҳам аввал, яъни бу йилнинг охири ёки янаги йилнинг бошида ўтказилиши мумкинлиги ва бу ҳолда мухолифатнинг умумий номзодини чиқариш учун оз вақт қолганини ҳам ҳисобга олган Марказий Кенгаш шундай қарорга келди:

1. “Давра Кенгаши”конференцияси ёки мухолифатнинг умумий қурултойида президентликка умумий номзод чиқариш механизми (регламенти) тезда яратилиши лозим.

2. Мухолифатнинг умумий номзодлигига “Бирлик” Партиясидан номзод қилиб (номзодликка номзод) партия раиси Абдураҳим Пўлат кўрсатилсин.

Қабул қилинган қарорларнинг бажарилишини таъминлаш Марказий Кенгаш Ҳайъатига топширилди.