Пўлат Охуннинг паспорти масаласи сиёсатлаштирилмоқда, ҳукумат ва 53-54-чилар тарафидан

Шу йил 16 майдаги хабаримизда ҳозирда Шаҳрихонда истиқомат қилаётган “Бирлик” Партияси раиси ўринбосари Пўлат Охуннинг Ички ишлар вазирлигининг тегишли идораларига муддати битган паспортини алмаштиришни сўраб қилган мурожаатлари оқибатсиз қолдирилаётгани ва “Эзгулик” жамияти бу иш билан шуғилланишга бошлаб, Ўзбекистон Бош прокуратураси ва Ички ишлар вазирлигига мурожаат этганини билдиргандик.

Кеча “Эзгулик” жамиятининг раиси Васила Иноят ўз хатига жавоб талаби билан Ички ишлар вазирлигига келди. Уни қабул қилган маъсул ходимлар “Эзгулик”ниннг хатига жавоб тайёрланиб, у махсус почта орқали Шаҳрихон милициясига юборилгани ва яқин кунларда оддий почта орқали “Эзгулик”нинг офисига юборилишини билдиришган. Васила Иноят ўзига ёзилган хатни шу ернинг ўзидаёқ ўзига берилишини, ёки ҳеч бўлмаса жавобнинг мазмунини билан таништирилишини сўраганда, қатъий рад жавоби олган. Бу фактнинг ўзи Ўзбекистонда расмий органлар қанчалик масхарабозлик саҳнасига айлантирилганини кўрсатади.

Бугун Васила Иноят ва “Бирлик” Партияси раиси ўринбосари Ҳамдам Сулаймон Шаҳрихонга келиб, шаҳар милициясидан маълумот олишга уриндилар, аммо ҳозирча паспорт масаласига ойдинлик киритадиган биронта жавоб тополмадилар. Сўнгра улар Пўлат Охун билан учрашдилар. Сўнгги кунларда у шаҳар, вилоят милиция бошқармаларидан ўз аризасига ёзувли жавоблар олган экан. Жавобларда унга янги паспорт бериш масаласи тегишли инстанцияларда ҳал этилаётгани умумий шаклда билдирилган холос.

“Бирлик” фаоллари бу масала бўйича нималар қилиш, ишларни қайси йўналишда олиб бориш хусусида келишиб олдилар.

Айни замонда, Пўлат Охун Ўзбекистон президенти Ислом Каримга қандайдир хат ёзгани хақида провокацион гаплар ҳам тарқалабошлаган. Хусусан 53-54-чиларнинг сайтида бу хақда хабар берилган. Пўлат Охун бу иддаоларни рад этди. У билан бугун телефонда гаплашган “Бирлик” Партияси раиси Абдураҳим Пўлат ҳам шундай жавоб олди.