Киевда «Бирлик» фаолига ҳужум уюштирилди

Кечикиб олинган хабарга кўра, 8 июль куни кечқурун сиёсий қочқин сифатида вақтинча Киевда яшаётган “Бирлик” Партияси фаоли Жамшид Боқиевга тахминан 10 кишилик гуруҳ ҳужум қилган ва уни аёвсиз калтаклаган. Қўли ва қовурғаси синган, бир кўзи шикастланган Жамшид хушсиз ҳолда шаҳар касалхоналаридан бирига ётқизилган ва хушига келгандан кейин унинг қочқинлиги маълум бўлгач, кеча 12 июлда БМТнинг Қочқинлар Бош Бошқармасига қарашли касалхонага ўтказилган.

Эслатиб ўтиш керакки, Жамшид Боқиев 2005 йил 30 май куни ҳукуматнинг Андижондаги хунрезлигини қоралаш ниятида “Бирлик” тарафидан Тошкентда режалаштирилган митингда қатнашиш ҳамма қаршиликларига қарамасдан пойтахтга етиб келолган оз сонли мухолифатчилардан бири бўлиб, ўшанда Тошкент милицияси томонидан ушланган ва қаттиқ калтакланган эди.

Кейинчалик, унга қарши тазйиқлар тўхтамагандан сўнгра, Жамшид ва унинг онаси Маҳбуба Боқиева Киевга келишди ва БМТнинг Қочқинлар Бош Бошқармасига мурожаат қилиб, бошқа давлатга чиқиб кетиш учун ҳаракат бошлашди. Бу ерда ҳам сиёсий фаолиятини тўхтатмаган Жамшид Боқиев “Бирлик” Партияси раисининг ўринбосари Исмоил Дадажон бошчилигида Ўзбекистон элчихонаси олдида ўтказилган пикет ва минтингларда қатнашди. У Исмоил Дадажон билан биргаликда Украина миграция ва миллий масалалар бўйича Давлат комитетининг раиси Сергей Рудик билан учрашгани сайтимиздаги хабарлардан ҳам маълум (2006 йил 9 июнь хабарларига қаранг).

Исмоил Дадажон оиласи билан Швецияга кетгандан кейин ҳам Жамшид Киевда қолган бошқа мухолифатчилар билан бир қатор сиёсий тадбирлар, хусусан, пикет ва митинглар ўтказишди. Кўринишидан у шу тадбилар ўтказилаётганида Ўзбекистон элчихонаси томи остида ишлаётган МХХчиларнинг назарига тушган.

У 8 июль куни кечга яқин касалхонада ётган онасини зиёрат қилиб уйига қайтаётган пайтида, шаҳар марказида номаълум одамлар гуруҳи унга ҳужум қилган. Воқеа шаҳар марказига яқин жойда бўлгани ва Жамшид у ҳужумчилар билан ҳеч бир конфликтда бўлмагани, ҳужум тўсатдан бошлангани каби фактлар шундан далолат бермоқдаки, бу ерда ўзбек МХХсининг қўли бор.