Ўзбекистон Марказий Сайлов Комиссияси Абдураҳим Пўлат билан кўришишни талаб қилмоқда

Кечикиб олинган хабарга кўра, ўтган жума куни, яъни 28 сентябрда “Бирлик” Партиясининг Бош котиби Васила Иноят Марказий Сайлов Комиссияси раисининг ўринбосари Шуҳрат Полвонов билан яна кўришган.

Аввалги хабарларимиздан маълумки, 18 сентябрь куни «Бирлик» Партиясининг номзоди Абдураҳим Пўлатни сайловчиларнинг ташаббускор гуруҳи (СТГ) орқали президентликка мустақил номзод сифатида кўрсатиш ишларини координация қилиш учун шу йил 17 августда тузилган Ташкилий Қўмита раҳбарлари Ҳайитбой Абдуллаев ва Васила Иноят Шуҳрат Полвонов билан учрашишганда, у сайлов масалаларини сайловлар расман эълон қилингандан кейингина гаплашиши мумкинлигини айтганди.

28 сентябрдаги учрашувда Васила Иноят Шуҳрат Полвоновга юқорида айтилан Ташкилий Қўмитанинг ҳужжатларининг топширмоқчи бўлган. Шунда Полвонов “СТГ мажлиси ўтказиш учун МСКнинг рухсати кераклигини, аммо Сайловчилар Ташаббус Гуруҳида номзоди кўрсатиладиган одам, яъни Абдураҳим Пўлат шахсан МСКга паспорти билан келиши кераклигини, унга қадар ҳеч қандай ҳужжатларни қабул қилмаслигини, демак, мажлис ўтказиш учун рухсат берилмаслигини” айтиб, қочиб кетган.

Бу расмий давлат ташкилоти вакилининг ножиддийлигидан хайрон қолиш керак, дейди мухбиримиз. Ташаббус гуруҳини ташкил қилувчиларнинг мақсади Абдураҳим Пўлатнинг номзодини президентликка кўрсатиш. Аммо, кўрсатиш ёки кўрсатмасликка СТГ қарор беради. Бунинг учун у мажлис ўтказиши керак. Бу мажлисга рухсат бериш учун Абдураҳим Пўлатнинг МСКга келишини талаб қилиш нафақат мантиқсиз, балки, қонунларга зиддир. Чунки, ҳеч бир қонунда МСКнинг бундай мажлис учун рухсат бериши кўзда тутилмаган. Абдураҳим Пўлат номзодини кўрсатиш учун фаолият олиб бораётган Ташкилий Қўмитианинг мақсади эса, МСК билан ҳамкорлик қилиш эди, халос.

Бундан ташқари, шу нарса ҳам маълум бўлдики, МСК бу масалада ўз ишларини Ўзбекистоннинг бошқа идоралари билан келишиб олиб бормоқда. Чунки, аввалги хабарларимизда айтилганидек, Абдураҳим Пўлат Ўзбекистонга қайтиш, паспортини янгилаш масаласида мамлакатнинг АҚШдаги элчихонасига мурожаат қилган. Кўринишидан, элчихона Абдураҳим Пўлатга жавоб бермаётган бўлса ҳам, унинг масаласи Ўзбекистон раҳбариятига етказилан ва бундан хабардор бўлган МСК вакили “Абдураҳим Пўлат парспорти билан бизга келсин” деб навбатдаги лўттибозлигини қилмоқда.

МСК раиси ўринбосари Шуҳрат Полвонов Ташкилий Кўмитианинг ҳужжатларини Васила Иноятнинг қўлидан олишлан қочгани сабабли, улар почта орқали олингани ҳақида тилхат бериладиган усул билан МСКга жўнатилган.