Пўлат Охун яна Қамчиқ девонида ушланди

26 ноябрдаги хабаримизда президент қароргоҳи олдида паспортини алмаштириш 9 ойдан бери чўзиб келинаётганига қарши очлик эълон қилиш учун Тошкентга кетаётган “Бирлик” раиси ўринбосари Пўлат Охун Қамчиқ девонида милиция, божхона ва чегарачиларнинг қўшма наряди томонидан ушлаб қолинганини билдиргандик. Кейин маълум бўлишича, “Эзгулик” раиси Васила Иноят Ички ишлар вазирлигига келиб, бу хусусда тушунтириш сўрагандан кейин, Пўлат Охун ўша куниёқ уйига қайтиб кетиш шарти билан қўйиб юборилган экан.

Аммо, бугун ўша воқеа яна қайтарилди. АҚШ элчиихонасининг таклифи билан Халқаро инсон хуқуқлари кунига бағишлаб бугун кечқурун элчиликда ўтказиладиган тадбирда қатнашиш учун Тошкентга келаётган Пўлат Охун Қамчиқ девонида ушланган. Воқеанинг бошқа тавсилотлари маълум эмас. “Эзгулик” жамияти бу масала билан шуғулланмоқда.