“Бирлик” Партияси Фарғона вилоят ташкилотининг конференцияси ўтказилди

Аввал хабар берганимиздек, бугун Қўқон шаҳрида “Бирлик” Партияси Фарғона вилояти ташкилотининг конференцияси ўтказилди. Конференция кун тартибида ташкилий масалалар, навбатдаги Қурултойга тайёргарлик, унга делегатлар сайлаш ва бошқа масалалар ўрин олганди. Мухбиримизнинг партия раиси ўринбосари Ҳамдам Сулаймонга таяниб билдиришича, конференцияда партиянинг 17 фаоли иштирок этти. Кун тартибидаги ташкилий масала юзасидан бўлиб ўтган муҳокамалардан сўнг вилоят кенгаши раиси лавозимига Адҳам Муҳиддин қайта сайланди. Вилоят кенгашининг 9 кишидан иборат таркибига қайта тартиб берилди.

Шунингдек, “Бирлик” Партиясининг шу йилнинг августи сўнгида ўтказилиши мўлжалланаётган иккинчи Қурултойига 10 делегат сайланган. Партия Қурултойи олдидан сафларни яна-да мустаҳкамлаш, ҳар хил провакацион чиқишларга барҳам беришга келишилган. Масалан, партиянинг маҳаллий ташкилотидан партияга аъзо бўлиб, раҳбар органларга сайланган Исмоил Дадажон, Рафиқ Ғани сингари кишиларнинг хатти-ҳаракатлари, тутуриқсиз баёнотларига муносабат билдирилиб, бу борада баёнот ҳам ҳозирланган.

Конференция ишчан кайфиятда ўтди. Мажлис иштирокчилари билан телефон орқали боғланган партия раиси Абдураҳим Пўлат “Бирлик” ҳар қачонгидан ҳам маъсулиятлди паллада тургани, демократик Ғарб билан интеграциялар жараёни партия фаолияти учун ҳам ўзига хос имкониятлар яратишини таъкидлади.

Партия раиси ўринбосари Ҳамдам Сулаймоннинг таъкидлашича, конференцияни ўтказиш, мажлис билан боғлиқ хатти-ҳаракатларга ҳукуматнинг ҳуқуқни муҳофаза қилиш органлари томонидан монелик кузатилмаган. Эҳтимол, ҳукумат энди шамолнинг қаёқдан эсаётганини тушунгандир, дейди “Бирлик” фаоли.