НАТО Россия билан алоқаларни тиклашга қарор қилди

Бугун бу ҳарбий-сиёсий альянснинг ташқи ишлар вазирлари йиғилишида Россия-Гуржистон урушидан кейин Россия билан узилган алоқаларни тиклаш қарори олинди. НАТО Россиянинг Абхазия ва Жанубий Осетияда қилаётган ишларига қарши қолишини, аммо жуда кўп муҳим масалаларда Россия билан алоқа ҳаётий эканлигини таъкидлаб, бу қадамини қилган.


АҚШ Давлат Котиби Хиллари Клинтон келаётган жума куни Россия Ташқи ишлар вазири Сергей Лавров билан Прагада учрашиши ҳам эълон қилинди. НАТО-Россия Кенгашининг бу босқичдаги биринчи мажлиси апрель ойида бўлиши ҳам айтилди.

Гуржистоннинг ва Россиядаги демократик мухолифатнинг бунга муносабати ҳали очиқлангани йўқ. НАТО Россия-Гуржистон конфликтида феълан Гуржистон томонида қолаётгани учун, бу мамлакат НАТОнинг бугунги қарорини эҳтиёткорона олқишласа керак.

Россия демократларидан бири Гарри Каспаров бугун АҚШда чиқадиган «Wall-Street Journal» газетасига берган интервьюсида АҚШ маъмуриятидан Путиннинг режимини қўллаб-қувватламасаликни сўраган. Табиий, унинг НАТО ва бошқа Ғарб иттифоқларидан ҳам шуни сўраган бўларди. Аммо, у НАТОнинг бугунги қарорини Путинни қўллаш деб ҳисолайдими, маълум эмас.

Аслида, НАТОнинг бугунги қарорида Россиянинг ҳозирги ҳукуматини қўллаш маъноси йўқ. Лекин, рус демократларининг кучсиз эканлигини ҳисобга олинса, худди Ўзбекистонда каби, Россияда ҳам демократик жараёнлар ўз-ўзидан олға кетмайди. Россияни Ғарбдан изоляция қилиш демократларга ёрдам бермайди.

Шу сабабли, дейди “Бирлик” Партияси раиси Абдураҳим Пўлат, рус демократлари ҳам бизнинг позицияда турсалар, ўзларига фойда бўлади. Бизнинг позиция эса маълум – диктаторликларни дунёдан изоляция қилиш ва турли санкциялар йўли билан мағлубиятга учратиб бўлмайди. Аксинча, уларни демократик дунёга интеграция қилиш керак. Демократик дунёнинг ёрдами билан демократик жараёнларни ривожлантириш маҳаллий демократларнинг ўз вазифасидир.