Пўлат Охун, “Бирлик” Партияси раисининг ташқи алоқалар бўйича ўринбосари:

25 август — “Бирлик” Партиясининг Таъсис қурултойи бўлган куннинг 6 йиллиги эди. Шу муносабат билан партия раисининг ўринбосари сифатида қисқа бир баёнот эълон қилмоқчиман.

Ўша Қурултойдан бир кун олдин мен Швецияга учиб кетишга мажбур бўлганман ва Қурултойда иштирок этолмаганман. Лекин, Қурултойни тайёрлашда ва уни моддий таъминлашда тўлиқ қатнашганман. Гарчи Қурултойда иштирок этмаган бўлсам ҳам, унинг қатнашчилари мени ташқи алоқалар бўйича раис ўринбосари этиб сайлашди. Бу вазифани бажариш йўлида мен қўлимдан келганча ҳаракат қилдим, бошқа партия ва ташкилотлар билан доимо мулоқатда бўлдим, ўзбек мухолифатини бирлаштириш мақсадида “Давра кенгаши” уюштирдим. Менга юклатилган вазифани бажариш йўлида турли халқаро ташкилотлар ва ўз ҳукуматимиз вакиллари билан ҳам мулоқот қилишга интилдим, ҳозир ҳам бу интилишларимни давом эттирмоқдаман.

Мен ишонаманки, ҳукумат ичида ҳам соғлом кучлар мавжуд ва улар Ўзбекистоннинг мустақилликка эришишида асосий роль ўйнаган “Бирлик”ни легаллаштириш — мамлакатимизда замонавий сиёсий системани тўлиқ шакллантириш йўлидаги асосий шартлардан биридир, деб ҳисоблайдиганлардир. Бундай одамлар президент аппаратида ҳам, ҳукуматда ҳам, ҳатто миллий хавфсизлик масалалари билан шуғулланувчи структураларда ҳам бор.

Мен “Бирлик”нинг низомига кўра, Қурултойда сайланганман ва фаолиятимни янги қурултой ўтказилгунча давом эттираман, маъсулиятдан қочмайман, вақти келиб қилган ишларим бўйича қурултойга ҳисобот бераман. “Бирлик”нинг ҳамма раҳбарият аъзолари шундай қилишларига ишонаман.

Мен “Бирлик”га кимгадир ёқиш учун ёки кимнингдир тарафдори бўлиш учун келмаганман, мен унга ўз ғоявий қарашларим асосида қўшилганман. Мен бирликчи бўлганим учун тазйиқларга учрадим ва икки йилдан ортиқ қамоқда ҳам ўтиришга мажбур бўлдим, лекин “Бирлик” йўлидан чекинмадим, унинг тутган йўлини тўғри йўл деб билганим учун бирликчи сифатида фаолиятимни давом эттирмоқдаман.

Бизга душманлик қилиб, “Бирлик”ни ичидан ва ташқарисидан парчалашга, ҳатто йўқ қилишга ҳаракат қилганлар кўп бўлди, лекин улар ҳеч нарсага эриша олмадилар, эриша олмайдилар ҳам.

Ҳозир жуда оғир шартлар остида “Бирлик” Партиясини Андижондаги қонли воқеаларидан кейин қайтадан оёққа қўйиш, навбатдаги Қурултойини ўтказиш учун ҳаракатларимиз давом этмоқда. Мен икки йил аввал Ўзбекистонга қайтиб бориб, биринчи навбатда, партиямизнинг Андижон вилояти ташкилотини, “Эзгулик”нинг вилоят бўлимини тиклаш учун ҳаракатлар қилдим. Бундан ташвишга тушган ҳукумат мени зўрлаб Ўзбекистондан чиқариб юборди.

Ҳукуматнинг тазйиқлари туфайли, мамлакат ичида шу кунларда фаолиятимиз анча суст. Айниқса, Андижонда суст. Мавжуд режимниннг босимлари остида қурултой ўтказиш имкониятимиз йўқлигини кўриб туриб, “Бирлик” Партиясининг раҳбарлик органларидаги вазифасини бажармаётган ёки бажаришдан қочаётганлар, айниқса, чет элда туриб қочаётганлар — партияга нисбатан хоинлик қилишмоқда. Бир қатор “Бирлик” раҳбариятининг намояндалари ва оддий бирликчилар, “Бирлик” фаоли эканликларини пеш қилиб, чет эллардан бошпана олгач, ҳеч қандай фаолият юритишмаётганини қўйиб турайлик, “Бирлик”га қарши фитаналар қилиш билан бандлар. Вақти келиб, улар бу ишлари учун партия ва жамият олдида жавоб берадилар.

Ҳозир ҳамма бирликчи сафдошларимизга мурожаат қиламан. Мухолифатни “Бирлик”да бирлаштириш ҳаракатига қўшилинг. Фақат “Бирлик” Партияси мавжуд режим билан курашишга, Ўзбекистонда демократик жараёнларни олға суришга, халқимизни фаровонликка қовуштиришга қодир. Келинг, бу ишни биргаликда давом эттирайлик.